Nara Lokesh: ఏపీ మంత్రి నారా లోకేశ్ సింగపూర్‌లో పర్యటిస్తున్నారు. ఐదు రోజుల పర్యటనలో భాగంగా సీఎం చంద్రబాబుతో కలిసి పలు కీలక కార్యక్రమాల్లో పాల్గొంటున్నారు. ఏపీకి భారీ ఎత్తున పెట్టుబడులను ఆకర్షించేందుకు సింగపూర్ పారిశ్రామికవేత్తలు, గ్లోబల్ సంస్థల ప్రతినిధులతో సమావేశం కానున్నారు. ఇందులో భాగంగానే ఏపీ పారిశ్రామిక విధానాలపై చర్చించనున్నారు.

తాజాగా, సింగపూర్‌లో నివసిస్తున్న తెలుగు డయాస్పోరా వలంటీర్లతో సమావేశమయ్యారు. ఈ సందర్భంగా నారా లోకేశ్ వైసీపీపై సంచలన వ్యాఖ్యలు చేశారు. గత ఐదేళ్ల వైసీపీ కాలంలో విధ్వంసకర పాలనతో విదేశాల్లో ఉన్న తెలుగువారంతా రాష్ట్రాన్ని కాపాడుకునేందుకు ముందుకు వచ్చారన్నారు. అందుకే ఏ దేశానికి వెళ్లినా ముందు తెలుగువారినే కలవాలని నిర్ణయించుకున్నామని వెల్లడించారు. ఇక్కడ ఉన్న తెలుగు వాళ్లందరూ రాష్ట్రానికి పెట్టుబడులు తీసుకొచ్చేందుకు కృషి చేయాలని నారా లోకేశ్ పిలుపునిచ్చారు.

అయితే, అమరావతి మాస్టర్ ప్లాన్, స్టార్టప్ ఏరియా అభివృద్ధికి సంబంధించి సింగపూర్ ప్రభుత్వంతో గతంలో ఒప్పందాలు కుదిరాయి. కానీ అంతకుముందు ఎన్నికల్లో వైసీపీ గెలవడంతో వాటిని రద్దు చేసిన సంగతి తెలిసిందే. మళ్లీ వాటిని పునరుద్ధరించడంతో పాటు అమరావతి అభివృద్ధికి సింగపూర్ సహకారాన్ని తిరిగి పొందేలా ఈ పర్యటన కొనసాగనుంది. ఈ పర్యటనలో మంత్రులు నారాయణ, టీజీ భరత్, ఉన్నతాధికారులు పాల్గొన్నారు. అయితే ఈ పర్యటన ద్వారా రాష్ట్రానికి కొత్త పెట్టుబడులు రావడమే కాకుండా సింగపూర్‌తో సంబంధాలు తిరిగి బలపడతాయని అధికారులు భావిస్తున్నారు.

లావా ఈరోజు అత్యంత సన్నని బడ్జెట్-సెగ్మెంట్ ఫోన్ లాంచ్ చేసింది.